讲多无谓。。。狂想曲

@泪倾港剧@

由以前开始，一直以嚟，我都係嗰唔容易喊嘅人。自称泪腺唔发达。就算係好熟好熟嘅老死，都係喺中学毕业典礼度见过我喊到猪头咁嘅样啫，平时我都係硬汉一条（自称）。以前我睇戏就真係睇戏咁，睇过就算，唔会有乜特别感觉，“睇戏啫嘛~又唔係真嘅~驶乜睇到飙晒眼水咁啊~嘥鬼气~~” 嗰个係以前嘅我。。不过间唔中都会有例外嘅~~譬如睇《铁达尼号》咁啰~~但係加阵就唔同咗啰。。连睇港剧都喊到好凄凉。。

不过话时话喇，加阵啲港剧真係越嚟越有催泪作用。就讲返上一排嗰套《学警出更》啫嘛~~本来睇到阿陶大宇应该冇乜感觉嘅。。点知做到后面嘅时候，即係阿Mdm郭羡妮俾奸人捉咗去之后仲要寄返Mdm啲嘢俾陶大宇嘅时候，所谓嘅“嘢”就係Mdm嘅证件同埋佢嘅牙啊！！啲匪徒掹咗佢啲牙落嚟啊~~几变态兼残忍啊~~搞到我喊唔停啊。。一路喊到结局。。

再讲返上次嗰套《爸爸闭翳》喇，当阿王喜一知道佢锡咗好多年嗰心肝命锭原来唔係自己嘅亲生女嘅时候，望住一路係咁嗌自己“爸爸”嘅乖女，睇到佢嗰种惆怅同埋唔舍得，我眼水又开始飙了。。一路喊到唱片尾曲。。睇亲情剧，会喊都好正常啫。。

到咗《铁咀银牙》，谂住话斗嘴兼搞笑嘅戏应该唔会喊了啩~~点知。。有一part话到，陈小春饰演嘅陈梦吉因为上公堂打官司而搞到佢哋陈家嘅诅咒灵验，老婆纳兰青青即係佘诗曼会一病唔起，仲会因此送命！！为咗救返佢嗰老婆，不惜牺牲自己，俾人打入监牢。。佢哋喺监牢入面嘅对话，又令我眼水飙。。老公喺牢里边揾唔到礼物，唯有用啲叶枝做咗3只草蜢仔出嚟畀仲未出世嘅小吉吉~~陈梦吉：“呢只须长啲嘅就係我，须短啲嘅係你。。仲有最细只呢只係小吉吉。。”好伤心啊。。我再睇第二次嗰幕，都係一样控制唔到眼水。。

跟住就係到《和味浓情》啦~~又係阿陶大宇做主角，配埋苏玉华女主角，本来都冇乜兴趣嘅啦~不过哩，睇睇下又真係几想继续追住落去嘅worr~~有两part哩，我係印象特别深刻嘅，其中一part就係阿Me自暴自弃，瞓喺个垃圾堆度，係咁话自己係垃圾，做老豆嘅秦沛见到个女醉成咁样，就话：“如果你係垃圾，我咁关心垃圾，咁我咪仲垃圾！！”之后就“咩”个女返屋企。。虽然只係短短一幕，但係都已经够晒感动了。。另一part係德高望重嘅老豆俾人发现原来係冇劏河豚（即係鸡泡鱼）嘅执照嘅！！所以被逼要执咗佢嗰间“一期一会”。。喺最后一晚，老豆终于讲出个真相，又整到我感动到喊晒了。。

《最美丽的第七天》，相信睇过嘅人应该都会难忍眼水啩。。我未睇嘅时候，我大学啲朋友已经叫我唔好睇啦，因为佢哋知我一定会忍不住眼水，但係我就唔觉得啰~因为套戏里面嘅凌加恩，即係周丽淇啦，对住游志颖，即係郑嘉颖啦，係好嗲嘅，咁我就唔係几觉得我会忍不住眼水啦，因为我真係觉得有啲打冷震，呵呵。。但係到咗后尾，阿恩不幸遗传咗佢妈妈嘅Li-Fraumeni症候群，身上会不断有肿瘤，其中一个肿瘤仲压住咗佢嘅语言神经线，令到佢表达唔到佢想讲嘅嘢。。就连佢想见佢个BB，都讲唔出口，睇到呢度我终于忍唔住了。。我都係睇咗呢套戏，先知道原来世界上係有一种咁可怕又可怜嘅遗传病。。

跟住落嚟就係《古灵精探》喇~~查实我就觉得呢套戏同几年前嗰套《栋笃神探》好相似~一样係查案嘅，一样都係应观众要求而有2个结局嘅~~2个结局就梗係1个好结局，1个坏结局啦~上次睇嗰套《栋》啊都已经搞到我喊到收唔到声啦，今次又整多套《古》，我又喊返够本喇。。睇《古》嘅坏结局时，我成个人吓到呆咗向度，因为嗰part真係拍到太突然了！！跟住我啲眼水又嚟不受控制咁飙了。。到睇好结局嘅时候，应该开心嘅啦，但係我依然喺度喊唔停，因为实在太感动了。。

最近先睇完嗰套《金石良缘》，又係催泪弹嚟嘅~~阿施嘉嘉，即係钟嘉欣饰演嗰个忽妹角色，佢有个老死，因为卖丸仔时差人查牌，惊俾差人拉，一时情急，就将全部丸仔食晒落肚，结果未送到医院就已经断气咗。。睇到嘉嘉为佢琢碑嗰一刻，再加啲佢哋2个以前一起嘅片断，想忍住唔喊都几难。。嘉嘉以前好坏好烂玩，堕过几次胎但係冇处理妥当，所以到佢想正常生育嘅时候，机会就唔高，好难得，佢同成日安，即係马浚伟结咗婚之后，终于有咗个BB，点知又俾佢嗰个唔生性个妹，陈法拉，醉酒驾驶撞到佢七个月大嘅BB冇咗！！但係基于剖腹生产会影响到妈妈将来嘅健康，所以唯有帮嘉嘉催生，顺产出嚟。。真係好惨啊。。要面对丧儿之痛，仲要好辛苦咁生个冇心跳嘅BB出嚟。。睇见都心痛。。

因为今次要写关于港剧，所以就衬返个景，用广东话喇~~

Labels: heart talk

* Orangie* ---- Thursday, June 26, 2008 4:28 AM

3 people counting stars with si meh